കടമത്ത്: ലക്ഷദ്വീപിലെ ഫാമുകളിലെ ഹാച്ചറിമെഷീനുകള്‍ (മുട്ട വിരിയിക്കുന്ന യന്ത്രം) ലേലത്തിന് വെച്ച് ലക്ഷദ്വീപ് മൃഗസംരക്ഷണ വകുപ്പ്. ഈ മാസം 28ന് വൈകുന്നേരം 4 മണിക്ക് മെഷീനുകള്‍ ലേലം ചെയ്യുമെന്ന് കടമത്ത് മൃഗസംരക്ഷണ വകുപ്പ് ഫാം മാനേജര്‍ പുറത്തിറക്കിയ അറിയിപ്പില്‍ പറയുന്നു.
ഫാം അടച്ചിടരുതെന്നുള്ള സുപ്രീം കോടതിയുടെ ഇടക്കാല ഉത്തരവ് നിലനില്‍ക്കെയാണ് ഉദ്യോഗസ്ഥരുടെ ഈ നീക്കം. മെഷീനുകള്‍ ഓരോന്നായിട്ടായിരിക്കും ലേലം ചെയ്യുന്നത്. ലേലത്തില്‍ പങ്കെടുക്കുന്നവര്‍ മെയ് 28 നാല് മണിക്ക് മുമ്പായി നിശ്ചിതതുക വെറ്റിനറി അസിസ്റ്റന്റ് സര്‍ജന്റെ പേരില്‍ കാനറ ബാങ്കില്‍ ഡി.ഡി ആയി അടച്ച് പേര് രജിസ്റ്റര്‍ ചെയ്യേണ്ടതാണെന്നും, ലേലം ഉറപ്പിച്ചാല്‍ മേലധികാരികളുടെ അനുമതിയോടെ 15 ദിവസത്തിനകം മെഷീനുകള്‍ ലേലം ഉറപ്പിച്ച ആളുടെ സ്വന്തം ചിലവില്‍ എടുത്ത് കൊണ്ടുപോകേണ്ടതാണെന്നും അറിയിപ്പില്‍ പറയുന്നു.